Од први до четврти мај се одржува Меѓународен фолклорен фестивал „Велигденски Средби 2016“ во село Ораовица, Радовишко. Овој Меѓународен фолклорен фестивал се одржува 12 година по ред и има натпреварувачки карактер. Оваа година за прв пат свое учество зеде и Детско Младинскиот Ансамбл „Трајко Прокопиев“ од Куманово. За организацијата, за наградите и за учесниците, денес во Радио Браво говореше Перица Димковски, уметнички директор на Детско Младинскиот Ансамбл „Трајко Прокопиев“, а овозможивме и телефонско јавување на Марио Стојковски, претседател на Ансамблот.
На Меѓународниот фолклорен фестивал „Велигденски Средби 2016“ настапија 18 ансамбли каде најдобрите беа наградени од специјалното жири. Ансамблот „Буримет е Шарит“ (Шарски Извори) од Тетово зеде дури четири награди, додека КУД „Карпош“ од Крива Паланка освои две награди меѓу кои и награда за најдобра играорка. Наградата за најдобра сценска изведба отиде кај ансамблот „Иван Планина“ од местото Тарчин, Босна и Херцеговина.