Добредојдовте во денешното издание на Албум на неделата на Радио Браво. Ја продолжуваме долгата традиција на претставување на албумски дела, по правило нови изданија на фрекфенцијата 88,5 мегахерци и на стримингот на radiobravo.com.mk. Денес пред нас е 9-тиот студиски албум на панк рок групата од Шведска чие име потекнува од зборот меланхолија и од името на една фигура поврзана со скејтбордирањето и се викаат Millencolin, а албумот едноставно S.O.S. – според интернационлниот код за помош. Но ајде малку да се запознаеме со Millencolin. Tоа е група формирана во октомври во 1992 година во градот Уребро во Шведска од швеѓанецот со српски корени Никола Шарчевиќ во улогата на пеач и бас гитарист, Mathias Farm на почеток како тапанар, а подоцна соло гитараи Erik Ohlasson на ритам гитара за да по неколку месеци, некаде на почетокот на 93-тата им се придружи и тапанарот Fredrik Larzon.
Оваа рок-панк дело, инаку 9-то по ред на Millencolin и албум кој е снимен во текот на 2018-тата во Sound Lab студиото во градот Уребро инаку сопственост на групата, миксан од страна на Jens Borgenво Fascination Street Studios, а издаден под етикетата на Epitaph Records и се појави на пазарот и во Европа и во САД на 15 февруари 2019 година. Инаки за да биде комплетирана целата работа во сопствена режија, албумот S.O.S. е продуциран од вокалот и бас гитаристот на бендот – Никола Шарчевиќ и од гитаристот Mathias Farm, а сите графики и фотографии на него се дело на вториот гитарист Erik Ohlasson.
Албумот S.O.S. за швеѓаните Millencolin е прво дело по 4 годишна пауза и нивниот претходен 8-ми по ред албум True Brew, но никако не треба да се помисли дека тие прават паузи во својата скоро 27 годишна музичка кариера. Групата е постојано заедно и зад себе имаат над 2000 живи настапи ширум светот, а за групата Никола Шарчевиќ вели дека тие се бенд кој навистина е формиран поради респектот и разбирањето на членовите на групата помеѓу себе и нивната пасионирана заљубеност во рок муиката, ако некој ги прашува тоа е најдобрата работа и занимање во светот, за нив лично.
Албумот S.O.S. на Millencolin е вистинска мелодична бомба со рок и поп акценти, но и со пулсирачки панк дух. Тоа е всушност и сето онаа по што групата е позната, во една мини звучна варијација тука е енергијата, брзината, емоциите, дури и баладите и слатките зборови на искривен шведско-англиски јазик. Целата продукција на албумот е навистина свежа и сосема доволно чиста. Тука е емотивниот акцент на Никола Шарчевиќ, торпедирањето на тапаните на Fredrik Larzon, соло делниците на Mathias Farm и фендерот на Erik Ohlasson со приметлив недостаток на вистинска бас гитара. Бендот ги има своите пет минути буквално, но истовремено ја задржува синергијата на целиот материјал. S.O.S. е најконкретното и најжестокото издание на Millencolin во последните 14 години – што значи дека секако го заслужува вашето внимание.
