Денеска во Радио Браво гостуваше директорката на НУ Музеј Куманово, Анита Цветановска. Во разговорот, таа ги најави многубројните проекти од областа на археологијата, етнологијата, конзервацијата и ликовната уметност кои ги реалира или ќе ги реализира оваа национална установа.
Од проекти од областа на археологијата актуелни се: Кокино и Градиште Младо Нагоричане, потоа Црквиште, Визијана Клечовце како и Костоперска Карпа. Со новиот проект за развој, Кокино ќе израсне во туристичка дестинација, атрактивна за странските туристи. Проектот за развој на Кокино вклучува нова интернет страница и видеозапис за локалитетот, како и аудиоводич во форма на мобилна апликација, поставување на патокази, реновирање на информативни табли, поставување на заштитни прегради за ранливите делови од опсерваторијата и оградување на локалитетот. Археолози од Единбург и Оксфорд, заедно со нашите архелози во март ќе вршат истражувања на микрорегионот околу Костопреска карпа, по што во октомври, ќе се изврши презентацијата и промоцијата на локалитетот во Саутемптон. Во јуни ќе се одржи меѓународен археолошко-астрономски научен симпозиум во Археолошкиот музеј во Скопје на тема Кокино –Тврдина на Сонцето на кој ќе присуствуваат еминенти претставници од археологијата и астрономијата, а на локалитетот е предвидено и одржување манифестација со изведување ритуали и музчка програма токму на денот кога Сонцето изгрева на означениот маркер. Музејот ќе реализира и две изложби посветени на Кокино. Едната ќе биде поставена во Археолошкиот Музеј во Скопје, а втората, амбиентално во кумановскиот музеј.
Музејот ќе го истражува и творештвото на зографот Петар Николов, ќе продолжи втората фаза на конзервација на иконите во црквата Свети Никола, а добиени се и средства за конзервација на артефактите пронајдени на локалитетот Кокино. Музејот веќе почнал со подготовките за комплетна реконструкција на спомен куќата на народниот херој Христијан Тодоровски Карпош, а ќе се спроведе и истражувачка дејност за Првата седница на Президиумот на АСНОМ во селото Рамно.
Музејот Куманово е активен и со свои проекти од областа на етнологијата во чии рамки се организира и проекција на два етно-филма во продукција на установата. Исто така, Музеј Куманово свое прикажување од повеќе дејности ќе има и во меѓународни рамки во повеќе градови ширум светот.
